“Дунё иморатлари ичида энг улуғи мактаб бўлса, касбларнинг ичида энг шарафлиси ўқитувчилик ва мураббийликдир”

                               Ислом Каримов

Самарқанд давлат ветеринария медицинаси, чорвачилик ва биотехнологиялар университетида  “1 октабр - Ўқитувчи ва мураббийлар куни” муносабати билан «Доим эъзоздасиз - азиз устозлар!» шиори остида байрам дастури ташкил этилди. 

Байрам тадбирида университет профессор – ўқитувчилари билан бир қаторда, таълим масканида узоқ йиллар самарали меҳнат қилиб, айни кунда нафақада бўлган  фаҳрий профессор – ўқитувчилар ҳам иштирок этишди.

Кеча иштирокчиларини Университет ректори, профессор Худайназар Юнусов табриклади ва Ветеринария ва чорвачиликни ривожлантириш давлат қўмитаси раиси Баҳромжон Норқобиловнинг табрик сўзларини барчага ўқиб эшиттирди.

Абдулла Авлоний: “Ҳар бир миллатнинг саодати, давлатнинг тинчи ва роҳати ёшларнинг яхши тарбиясига боғлиқдир,” - деган. Демак, устоз - мураббийларнинг зиммасида жуда ҳам буюк масъулиятли вазифа юкланган. Бу ҳам бўлса, келажаги буюк давлат учун комил, ҳар томонлама етук ва баркамол, маънан ва ахлоқан пок, ватанпарвар ва инсонпарвар инсонларни тарбиялаб чиқариш вазифаси. Ҳа, ўқитувчи ва мураббийлик жуда машаққатли, юксак сабр ва матонат талаб қиладиган касб! Бу касб эгалари эса ҳамиша эҳтиромга муносибдир!

Байрам муносабати билан ўз фаолияти давомида алоҳида ўрнак кўрсатган, ёшларга таълим ва тарбия беришдек муқаддас вазифани шараф билан адо этаётган, шунингдек айни кунда шогирдлари ва фарзандлари ардоғида  кексалик гаштини сураётган профессор - ўқитувчилар  Ветеринария ва чорвачиликни ривожлантириш давлат қўмитаси ҳамда Университет раҳбариятининг “Ташаккурнома”, “Фаҳрий ёрлиқ” ва қимматбаҳо эсдалик совғалари билан тақдирланди, шунингдек, қўмита раиси томонидан тақдим этилган 2 дона замонавий телевизор маънавий – маърифий ишлар яхши йўлга қўйилганлиги учун Университет биринчи проректори Алибек Гаппаровга топширилди.

Байрам кечаси талаба – ёшларнинг бадиий чиқишлари билан давом этди.Маърифий дастурдан сўнг унинг иштирокчилари байрам дасдурхонига таклиф этилди.

Ахборот хизмати