SAMARQAND VILOYATI HOKIMLIGI, VILOYAT, TUMANLAR MUTASADDILARI VA TADBIRKORLARNING SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI JAMOASI BILAN UCHRASHUVI BO‘LIB O‘TDI

SAMARQAND VILOYATI HOKIMLIGI, VILOYAT, TUMANLAR MUTASADDILARI VA TADBIRKORLARNING SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETI JAMOASI BILAN UCHRASHUVI BO‘LIB O‘TDI

Samarqand viloyati hokimining tashabbusi bilan "Tarmoq - Korxona - Oliygoh" tamoyilini yo‘lga qo‘yish maqsadida viloyat hokimligi huzuridagi Tadbirkorlar Jamoatchilik Maslahat Kengashining navbatdagi uchrashuvida viloyat hokimining o‘rinbosari Sh.Xudoyberdiyev, viloyat hokimining mahalliy sanoatni rivojlantirish masalalari bo‘yicha yordamchisi N. Ibragimov boshchiligida viloyatdagi yirik korxonalar rahbarlari va tadbirkorlar dastlab universitetning ilmiy va innovatsion salohiyati, universitetda mavjud imkoniyatlar hamda amalga oshirilayotgan loyihalar holati bilan tanishdi.

Tadbir davomida mehmonlarga universitet rektori, professor X.B.Yunusov tashabbusi bilan tashkil etilgan O‘zbekistonda veterinariya, biotexnologiya va chorvachilik sohasini rivojlantirish uchun ilmiy kadrlarni intensiv tayyorlash biznes inkubatorini tashkil etishga qaratilgan “Mega loyiha”ning umumiy mazmun-mohiyati bilan tanishtirildi. Mas’ul ijrochilar “Mega loyiha” doirasida parrandachilik, echkichilik, quyonchilik, qo‘ychilik, qoramolchilik, baliqchilik va asalarichilik sohasida amalga oshirilayotgan ilmiy izlanishlar va yutuqlar haqida ma’lumot berishdi. Tashkil etilgan Veterinariya klinikasi va veterinariya jarrohligi amaliyoti bilan tanishish ham mehmonlarda katta taassurot qoldirdi.

Shuningdek, tadbir ishtirokchilari universitetda  Jahon banki, Islom taraqqiyot banki mablag‘lari va Halqaro loyihalar doirasida tashkil etilgan o‘quv laboratoriyalar bilan tanishib, ularning tadbirkorlik faoliyatidagi o‘rni haqidagi ma’lumotga ega bo‘lishdi.

Shundan so‘ng, universitet bosh binosidagi Madaniyat saroyida universitet pedagogik kadrlari ilmiy ishlanmalari taqdimoti va ularni amalga oshirish yo‘llari  hamda universitet ilmiy pedagogik kadrlarining viloyatdagi tadbirkorlik sub’yektlari bilan hamkorlik yo‘nalishlari muhokama qilindi.

Muhokama avvalida universitet rektori, professor Xudaynazar Yunusov universitetning bugungi hayoti, uning ilmiy va innovasion salohiyati, universitetda mavjud imkoniyatlar hamda amalga oshirilayotgan loyihalar haqida qisqacha to‘xtalgan bo‘lsa, viloyat hokimining mahalliy sanoatni rivojlantirish masalalari bo‘yicha yordamchisi N. Ibragimov o‘tkazilayotgan mazkur uchrashuvning mazmun-mohiyatiga to‘xtaldi va "Tarmoq - Korxona - Oliygoh" tamoyili bo‘yicha qilinishi lozim bo‘lgan masalalarga e’tibor qaratdi.

Shundan so‘ng ishlab chiqarish korxonalari bilan integratsiyani yo‘lga qo‘yish borasida mavjud imkoniyatlardan kelib chiqqan holda takliflar taqdimoti qilindi, tarmoq korxonalarining muammolariga ilmiy yechim berishga qaratilgan  ishlanmalar ko‘rib chiqilib, ishlab chiqarish korxonalarida kafedralar tashkil etish, talabalarning ishlab chiqarish amaliyotlarini yo‘lga qo‘yish masalalari jiddiy ko‘rib chiqildi.

Yirik korxona rahbarlarining va universitet talabalari bilan bo‘lib o‘tgan uchrashuvida iqtidorli bitiruvchi talabalar tomonidan taqdim etilgan startap loyiha va takliflar yig‘ilganlarda katta taassurot va qiziqish uyg‘otib, bu loyihalarni amalda joriy etishga kelishib olindi.

Tadbir davomida bitiruvchi talabalarni ishga joylashtirish yarmarkasi tashkil etilib, ko‘plab talabalar o‘zlariga ma’qul bo‘lgan ish o‘rinlariga ega bo‘lishdi.