UNIVERSITET HAQIDA

Oʻzbekiston Respublikasi Veterinariya va chorvachilikni rivojlantirish davlat qoʻmitasining 2022 yil 7-maydagi 54-i/ch- sonli buyrugʻiga 1-ilova

Samarqand davlat veterinariya meditsinasi, chorvachilik va biotexnologiyalar universitetining

USTAVI

I.Umumiy qoidalar

     Samarqand davlat veterinariya meditsinasi, chorvachilik va biotexnologiyalar universiteti (keyingi oʻrinlarda “Universitet” deb ataladi) Oʻzbekiston Respublikasi Prezidentining 2022 yil 31 martdagi PQ №187 sonli “Veterinariya va chorvachilik sohasida kadrlar tayyorlash tizimini tubdan takomillashtirish toʻgʻrisida”gi qaroriga asosan Oʻzbekiston Respublikasi Veterinariya va chorvachilikni rivojlantirish davlat qoʻmitasiga boʻysunadi.

     Oʻzbekiston Respublikasi Prezidentining 2022 yil 31 martdagi PQ-187-sonli qaroriga asosan Universitet veterinariya meditsinasi, veterinariya sanitariya ekspertizasi, veterinariya diagnostikasi va laboratoriya ishlari, veterinariya farmatsevtikasi, zooinjeneriya, veterinariya biotexnologiyasi, chorvachilik mahsulotlarini qayta ishlash texnologiyasi yoʻnalishlarida kadrlar tayyorlovchi tayanch oliy taʼlim muassasasi hisoblanadi.

         Universitet Veterinariya va chorvachilikni rivojlantirish davlat qoʻmitasi tizimida faoliyat yuritadi.

       Universitet davlat oliy taʼlim muassasasi hisoblanib, oliy taʼlimning asosiy va qoʻshimcha taʼlim dasturlarini bajarish boʻyicha taʼlim faoliyati bilan shugʻullanadi. Oʻzbekiston Respublikasining qonun hujjatlariga muvofiq oʻquv-pedagogik, ilmiy-metodik va boshqa faoliyatni amalga oshiradi hamda taʼlim xizmatlarini koʻrsatadi.

       Universitet oʻz faoliyatida Oʻzbekiston Respublikasining Konstitutsiyasi, “Taʼlim toʻgʻrisida”gi Qonuni, Kadrlar tayyorlash milliy dasturi, Oliy Majlis palatalarining qarorlari, Oʻzbekiston Respublikasi Prezidentining Farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Veterinariya va chorvachilikni rivojlantirish davlat qoʻmitasining hamda Oliy va oʻrta maxsus taʼlim vazirligining normativ-huquqiy hujjatlari va mazkur Ustaviga amal qiladi.

       Universitet yuridik shaxs hisoblanadi. Operativ boshqaruvida oʻziga xos maxsus mol-mulkka ega va ushbu mol-mulk boʻyicha oʻz majburiyatlariga muvofiq javob beradi, oʻz nomidan mol-mulk sotib olishi va mulkiy hamda nomulkiy huquqlarni amalga oshirish, zimmasiga majburiyat olishi, sudda daʼvogar va javobgar boʻlishi mumkin.

      Mustaqil balansga, bank muassasalarida hisob-kitob va boshqa, shu jumladan, valyuta boʻyicha hisob raqamlariga, Oʻzbekiston Respublikasi davlat gerbi tasviri tushirilgan va oʻz nomi yozilgan muhrga, shtamplar va boshqa rekvizitlarga ega.

Universitet joylashgan manzil:

Indeks: 140103, Samarqand shahri, M.Ulugʻbek koʻchasi 77-uy.

Universitetning oʻzbek (kirill va lotin), rus va              ingliz tillaridagi rasmiy nomi va qisqartmasi:

         Samarqand     davlat      veterinariya       meditsinasi,       chorvachilik     va biotexnologiyalar universiteti, SDVU;

         Samarkand davlat veterinariya meditsinasi, chorvachilik va biotexnologiyalar universiteti, SDVU;

         Самаркандский государственный университет ветеринарной медитсины, животноводства и биотехнологий, СГУВ;

         Samarkand   State   University   of   Veterinary   Medicine,   Livestock   and Biotechnologies, SSUV.

Samarqand      davlat      veterinariya       meditsinasi,       chorvachilik     va biotexnologiyalar universitetining Toshkent filiali joylashgan manzil:

        Toshkent shahri, Toshkent shahar, Chilonzor tumani 20-mavze, 35a-uy;

Samarqand      davlat      veterinariya       meditsinasi,       chorvachilik     va biotexnologiyalar universitetining Nukus filiali joylashgan manzil:

        Qoraqalpogʻiston Respublikasi, Nukus shahri, Utepov koʻchasi, 31-uy.

II.Universitetning asosiy vazifalari

         Universitetning asosiy vazifalari quyidagilardan iborat: veterinariya, chorvachilik,    biotexnologiya,  agrotexnologiya,

agroiqtisodiyot tarmoqlari uchun oliy maʼlumotli kadrlarni tayyorlash;

zamonaviy oʻquv va ilmiy-laboratoriya bazasini shakllantirish, ilgʻor texnologik asbob-uskunalar bilan jihozlash hamda sohani rivojlantirishga qaratilgan ilmiy-innovatsion tadqiqotlarni kengaytirish; 

oʻquv jarayonini amaliy koʻnikmalarni shakllantirishga yoʻnaltirish, xalqaro taʼlim standartlariga asoslangan ilgʻor pedagogik texnologiyalar, oʻquv dasturlari va innovatsion oʻquv-uslubiy materiallarni keng joriy etish, veterinariya klinikasi, oʻquv va ilmiy laboratoriya, oʻquv tajriba xoʻjaligi, ishlab chiqarish va qayta ishlash korxonalarida nazariy bilim hamda amaliyotning uygʻunligini taʼminlash uchun zarur sharoitlar yaratish;

ilmiy va ilmiy-pedagogik kadrlar tayyorlash, qayta tayyorlash va ularning malakasini oshirish boʻyicha uzluksiz taʼlim tizimini yaratish; 

yetakchi xorijiy oliy taʼlim muassasalari bila qoʻshma taʼlim dasturlari va ilmiy loyihalarni joriy etish, Universitet professor-oʻqituvchilarining malakasini oshirish, bitiruvchilarning respublika va xorijiy oliy taʼlim muassasalarida (ilmiy markazlarda) magistratura va doktorantura dasturlari boʻyicha taxsil olishlarini tashkil etish; 

oʻquv jarayonini talabalarda mustaqil taʼlim olish, tizimli tahlil qilish, ijodiy fikrlash va amaliy, jumladan tadbirkorlik koʻnikmalarini shakllantirishga yoʻnaltirish; sohadagi ilmiy-tadqiqot institutlarining yetakchi olimlarini Universitetda tahsil olayotgan iqtidorli talabalarga biriktirgan holda fan, taʼlim va ishlab chiqarish integratsiyasini taʼminlash;