Universitetda xalqaro konferensiya Keyingi yillarda oziq-ovqat xavfsizligi jahon hamjamiyati oldidagi eng dolzarb masalalardan biriga aylangani sir emas. Iqlimning keskin o‘zgarishi natijasida ro‘y berayotgan tabiiy ofatlar, suv taqchilligi, qurg‘oqchilik kabi omillar ta’siri vaziyatni yanada murakkablashtirmoqda. Buning natijasida jahon bozorida oziq-ovqat mahsulotlari narxining keskin ko‘tarilish holati kuzatilyapti. Muammoni sohani yangi innovatsion texnologiyalar hamda ilmiy yutuqlarni amaliyotga joriy etish orqali yechish mumkinmi?  Bu borada nisbatan yangi soha hisoblanadigan Biotexnologiya - global masalani yechishga va uning oqibatlarini yumshatishga xizmat qilishidan umid qilish mumkin. Bu olimlarning fikri. “Biotexnologiya va oziq-ovqat xavfsizligi muammolari” mavzusida Samarqand davlat veterinariya meditsinasi, chorvachilik va biotexnologiyalar universitetida bo‘lib o‘tayotgan xalqaro ilmiy-amaliy anjumanda soha mutaxassislari ana shu muammo yuzasidan o‘z tadqiqotlari va ilmiy izlanishlari bilan o‘rtoqlashmoqda.  Xalqaro konferensiyada Rossiya Federatsiyasi, Qozog‘iston, Belorus Respublikasi, Ruminiya, Polsha, Tojikiston va Turkiyadan soha mutaxassislari, yosh olim va tadqiqotchilar onlayn va oflayn tarzda ishtirok etishmoqda.

Anjumanda chorva ozuqalarini bioqo‘shimchalar bilan boyitish va veterinariya sohasida biotexnologiyaning ahamiyati, bio xilma-xillikni asrash borasidagi zamonaviy tatqiqotlar hamda ularning dolzarb masalalari, oziq-ovqat xavfsizligini ta’minlashda fan, ta’lim va ishlab chiqarish integratsiyasi bo‘yicha o‘tkazilgan ilmiy tadqiqotlarning natijalari, innovatsion texnologiyalar hamda mavjud muammolar haqidagi fikr va g‘oyalar bayon etilib,  keng muhokama qilindi.

Hozirgi kunda universitet “Biotexnologiya” kafedrasida faoliyat olib borayotgan olimlar, tayanch doktorantlar, mustaqil izlanuvchilar, magistrlar va iqtidorli talabalar tomonidan ilmiy maslahatchilari bilan hamkorlikda globallashuv sharoitlarida oziq-ovqat xavfsizligi doirasida  ilmiy tadqiqot ishlari hamda ushbu maqsadga erishish uchun tizimlashtirilgan keng ko‘lamli izlanishlar olib borilmoqda.

Konferensiya ishida “Biotexnologiya” kafedrasi mudiri, biologiya fanlari nomzodi, dotsent Nasiba Ho‘jayeva koordinatorlik qildi.

Chorvachilik va veterinariya sohasida biotexnologik usullardan foydalanib, qishloq xo‘jalik hayvonlari ozuqalarini boyitish, mahsuldor va kasalliklarga chidamli bo‘lgan transgen hayvon zotlarini yaratish va hokazo yo‘nalishlarda olib borilayotgan tadqiqotlar mamlakatimiz iqtisodiyotida bu sohaning o‘rni oshib borayotgani va izlanishlar taraqqiyotga xizmat qilishiga ishoradir.

Konferensiyada xorijiy davlatlardan 10 nafarga yaqin soha mutaxassislari, shuningdek, respublikamizning 20 dan ortiq sohaga oid tashkilotlaridan 100 nafardan ortiq mutaxassis va olimlar o‘zlarining oziq-ovqat xavfsizligi mavzusidagi bugunning dolzarb masalalariga qaratilgan ma’ruzalari bilan ishtirok etishdi.

“Bionova” laboratoriyasi direktori, professor T.A.Nugmanova (Rossiya Federatsiyasi), Vitebsk davlat veterinariya meditsinasi akademiyasi rektori N.I. Gavrichenko (Belorus Respublikasi), Kluj-Napoka qishloq xo‘jaligi fanlari va veterinariya meditsinasi universiteti doktori Adriana Aurori (Ruminiya), Rossiya FAning akademigi V. N. Zelenkov, Gaziantep viloyati Antep pistasi ilmiy tadqiqot instituti doktori Ajlan Yilmaz (Turkiya)lar tomonidan ilgari surilgan fikrlar va tadqiqotlar natijalari shular jumlasidandir.

Anjumanda mutaxassislar ishtirokida ko‘rib o‘tilgan masalalar va takliflar oziq-ovqat xavfsizligi sohasining rivojlanishiga xizmat qiladi. Tadbir jarayonida bu alohida qayd etildi. 

Axborot xizmati