DOIM E’ZOZDASIZ, AZIZ USTOZLAR!
Mamlakatimizda 1997-yildan boshlab 1-oktyabr - O‘qituvchi va murabbiylar
kuni bayrami nishonlanib kelinmoqda. SamDVMCHBU “Madaniyat saroyi”da “Doim
e’zozdasiz, aziz ustozlar!” shiori ostida o‘tkazilgan bayram tadbirida faxriy
ustozlar va universitetda ayni kunda faoliyat ko‘rsatayotgan professor –
o‘qituvchilarga hurmat – ehtirom ko‘rsatildi.
Universitet rektori, professor Xudaynazar Yunusov barcha ishtirokchilarni ulug‘ bayram – 1-oktyabr - O‘qituvchi va murabbiylar kuni bayrami bilan qutladi.
- Ustoz-murabbiylar mehnatini ulug‘lash kishini kamolotga, baxt va yorug‘ istiqbolga eltishi aniq. Bugungi kunda yurtimizda ta’lim tizimi islohotlariga ustuvor ahamiyat qaratilmoqda. Bu albatta, ilm-ma’rifat o‘choqlarida fidokorona mehnat qilayotgan barcha professor-o‘qituvchilar, tarbiyachi-murabbiylar mehnatining ham munosib qadrlanishiga asos bo‘lmoqda, - dedi rektor Xudaynazar Yunusov. - Shu bois, har birimiz o‘z kasbimizga sadoqat bilan yondashib, ilm-fanning ilg‘or yutuqlari hamda xalqimizning qadriyat va bebaho merosini yosh avlodlarimizga yetkazishimiz ham farz, ham qarzdir. Bu yo‘lda barchanining ilmiy-pedagogik, tadqiqotchilik faoliyatiga muvaffaqiyat yor bo‘lsin.
Shuningdek,
tadbirda O‘zbekiston Respublikasi Veterinariya va chorvachilik rivojlantirish
qo‘mitasi raisi, veterinariya fanlari doktori, professor Bahrom Norqobilov
ishtirok etib, barcha professor-o‘qituvchilarni bayram bilan tabrikladi.
- Bu olamda kasblar ko‘p. Lekin insoniyat ular ichida eng sharaflisini O‘qituvchilik, ustoz va murabbiylik deb ataydi. Chunki Ustoz, deganda har birimizning ko‘z oldimizga albatta sofdil, ma’naviy boy, axloqan pok, kamtarin zot – o‘qituvchi keladi, - dedi Bahrom Norqobilov. - Vatanimizning taqdiri va kelajagi uchun mas’uliyatni zimmasiga olishga qodir yangi avlodni tarbiyalash barchangizdan katta kuch-g‘ayrat, azmu shijoat bilan mehnat qilishni talab etadi. Ana shunday sharafli mehnatingizda, xalqimizni sifatli oziq-ovqat bilan ta’minlashda muhim o‘rin tutadigan veterinar mutaxassislarni tayyorlashda Sizlarga kuch-g‘ayrat, olijanob faoliyatingizda ulkan muvaffaqiyatlar tilayman.
Bayram tadbirida universitetning bir guruh professor – o‘qituvchilari Oliy ta’lim va innovatsiyalar vazirligi, Veterinariya va chorvachilikni rivojlantirish qo‘mitasi, Respublika qishloq xo‘jalik vazirligining yuksak mukofoti va e’tiroflariga, universitet rektorining “Fahriy yorlik” va “Tashakkurnoma”lariga sazovor bo‘ldilar.
Tadbir davomida mukofotlar
egalariga tantanali ravishda topshirilib, universitet ijodkor talabalari
tomonidan diltortar kuy-qo‘shiqlar yangradi.
