Ota - ona ruhimizning Arshi A’lodan yerga tushishiga sababchi bo‘lishsa, ustozlar uni yana yuqori sari yuksalishiga sababchi bo‘larkan. 
Ustozlar ana shunday buyuk Inson. Biz ana shu Insonlar tufayli bugungi darajamizga, maqomimizga erishganmiz, buni tan olaylik. 
Qo‘limizga qalam tutqazgan, harf tanitgan, dunyoni anglatgan Ustoz – murabbiylarimizning zahmatli mehnati, mashaqqati va hoxish – irodasi natijasi o‘laroq, biz bugun dunyoga yuz tutdik. 
Dunyoda kasblar ko‘p, ammo ularning orasida eng ulug‘i – Ustozlik maqomidir. Erishganlarimizda ularning halol haqqi bor, azizlar!   
Mamlakatimizda 1 oktyabr - O‘qituvchilar va murabbiylar kuni umumxalq bayrami sifatida uzoq yillardan buyon keng nishonlab kelinmoqda. Ming-minglab murg‘ak qalblarga ezgulik yog‘dusini sochadigan, o‘z o‘quvchilariga hayot maktabini beradigan, hoh u oliy ta’limda bo‘lsin, hoh xalq ta’limida yoki maktabgacha tarbiya muassasasidami – eng mo‘tabar zot - o‘qituvchi va murabbiylarimizga, Ustozlarga bugungi kasb bayramingiz muborak bo‘lsin, deymiz! 
Samarqand davlat veterinariya medisinasi, chorvachilik va biotexnologiyalar universitetida ayni kunda 400 nafarga yaqin professor - o‘qituvchilar 6000 nafarga yaqin yoshlarga ta’lim – tarbiya berishmoqda. Ularning har birining o‘z uslubi va dars o‘tish metodikasi va boshqa jihatlari mavjud, albatta. Ular ilmiy faoliyat bilan birgalikda malakatimiz iqtisodiyoti, qishloq xo‘jaligi, veterinariya, chorvachilik va biotexnologiya sohalari uchun malakali va raqobatbardosh kadrlar tayyorlashdek muqaddas vazifani chin ko‘ngildan ado etishmoqda. 
Universitet jamoasi va shaxsan o‘z nomimdan yurtimizdagi barcha Ustoz va murabbiylarni kasb bayrami bilan muborakbod etaman. Bu sharafli nomni ulug‘lab kelayotgan barcha vatandoshlarimizni chin qalbimdan tabriklayman! 
Yuksak mas’uliyatli, mashaqqatli va sharafli mehnatingizda zafarlar, oilaviy hayotingizda esa, omad yor bo‘lishini tilayman. 
Bugun hayot bo‘lgan Ustozlarimizning umri ziyoda bo‘lsin! 
Olamdan o‘tganlarining oxiratlari obod bo‘lsin! 
Yoshlarning bilim va malakasini oshirishga qo‘shayotgan samarali mehnatingiz uchun tashakkur bildiraman. 

 
Kamoli ehtirom bilan, Xudaynazar Yunusov 
Biologiya fanlari, doktori, professor 
O‘zbekiston Respublikasida xizmat ko‘rsatgan chorvador          
SamDVMCHBU rektori