SAMARQAND DAVLAT VETERINARIYA MEDITSINASI, CHORVACHILIK VA BIOTEXNOLOGIYALAR UNIVERSITETIDA “MILLIY QADRIYATLAR SAYLI” KO‘TARINKI RUHDA O‘TKAZILDI
Universitet rektori, professor Xudaynazar Yunusov boshchiligidagi festival ishtirokchilari dastlab milliy qadriyatlar, urf-odat va an’analarimiz yorqin namoyon etilgan rang-barang ko‘rgazma asarlari bilan yaqindan tanishishdi.
Bir yonda bir-biridan totli milliy taomlarning yoqimli tafti, yana bir yonda egnida atlasu adraslarda o‘zbekona iffat ila salom berayotgan talaba-qizlar, ayniqsa, milliy qadriyatlarimiz yo‘g‘rilgan o‘lanu laparlarning jarangi tadbirga yanada ko‘tarinkilik ulashdi.
- Festivalni tashkil etishdan asosiy maqsad jonajon yurtimiz milliy qadriyatlari, urf-odatlari va an’analarini asrab-avaylash, keng targ‘ib qilish hamda xalqimizning azaliy va boqiy merosi bilan yoshlarimizni yaqinroq tanishtirishdan iborat, - dedi festivalda ishtirok etgan universitet rektori, professor Xudaynazar Yunusov.
Xalq sayli ko‘rinishiga ega festivalda milliy sport musobaqalari, milliy xalq o‘yinlari, milliy kiyimlar va milliy taomlar ko‘rgazmasi, milliy rasm-rusumlar namoyishi tashkil etildi.
