Samarqand veterinariya meditsinasi, chorvachilik va biotexnologiyalar universiteti rektori, X. Yunusov tug‘ilgan kuni, muborak 65 yoshi o‘zi tug‘ilib o‘sgan olis Qashqadaryo viloyati, Yakkabog‘ tumanida joylashgan, ilm yo‘lida ulkan poydevor vazifasini bajargan jonajon maktabi – 48-umuta’lim maktabida maktab o‘quvchilari, faxriy bitiruvchi sinfdoshlari bilan qizg‘in uchrashuv tarzida nishonlandi.

Ustoz maktab o‘quvchilari bilan uchrashuvda bolalik davrlarini eslarkan, maktab o‘sha vaqtlarda 8-yillik bo‘lgani, mutaxassis yetishmasligidan Andijondan er-xotin o‘qituvchilar qishloqqa ko‘chib kelib, kimo-biologiyadan dars berganligi, ushbu sohani tanlashida shu ustozlarimning xizmatlari juda katta bo‘lganligini ta’kidlab, inson ilm-fan sohasida qiyinchilik ko‘rib, ularni yengib o‘tsa, zaxmat chekishdan cho‘chimasa, albatta rohatini ko‘rishini aytib o‘tdi. 

Universitet rektori qadrdon maktabiga o'zining shaxsiy mablag'lari hisobidan 5 ta komputer jamlanmasi, ijod mahsuli bo‘lgan 50 dan ziyod ilmiy kitoblar jamlanmasi va 100 ga yaqin badiiy asarlar to‘plamini sovg‘a qilish barobarida, kimo-laboratoriya xonasida kimyo fanidan dars o‘tishi o‘quvchilar uchun haqiqiy ma’naviy sovg‘a bo‘ldi.

Sinfdosh bitiruvchilarning sinfxonada “Bitiruvchilar 40 yilligi” bayram torti tashkil etishi Ustoz uchun kutilmagan va o‘ta hayojonli daqiqalarni tuhfa etgan bo‘lsa, maktab o‘quvchilarining turfa she’rlar aytib, qo‘shiqlar kuylashi tadbirga yanada o‘zgacha rux baxsh etdi.

Ma’naviyat Info