“Chorvachilik tarmoqlarini rivojlantirishning dolzarb masalalari: tajriba, muammo va yechimlar” O‘zbekiston Respublikasi Oliy Majlisi Senatining Agrar va suv xo‘jaligi masalalari qo‘mitasi hamda Veterinariya va chorvachilikni rivojlantirish qo‘mitasi bilan hamkorlikda SamDVMCHBUda “Chorvachilik tarmoqlarini rivojlantirishning dolzarb masalalari: tajriba, muammo va yechimlar” mavzusida konferensiya bo‘lib o‘tdi. Konferensiyada Senat qo‘mitasi raisi B. Tojiyev, Veterinariya va chorvachilikni rivojlantirish qo‘mitasi raisi birinchi o‘rinbosari A.Akbarov, Universitet filiallari, texnikumlari, shuningdek ilmiy tadqiqot va ilmiy tekshirish institutlari mas’ul mutasaddi rahbarlari ishtirok etishdi.

Konferensiya ishini universitet rektori, professor Yunusov ochib berdi va mehmonlarni qutladi. Veterinariya va chorvachilikni rivojlantirish qo‘mitasi raisi B.Norqobilov ZOOM dasturi orqali tadbirda ishtirok etdi va ma’ruza qildi. Rais o‘z nutqida keyingi yillar davomida mamlakatimizning drayver sohasiga aylangan chorvachilikka xukumatimiz, shaxsan Prezidentimiz tomonidan qaratilayotgan e’tibor, tizimda amalga oshirilayotgan islohotlar va buning natijasi o‘laroq qo‘lga kiritilayotgan yutuqlar xususida gapirdi.

Jumladan,   Prezidentimizning 2023 yil 24 avgustda “Chorvachilikda identifikatsiya qilish tizimi va naslchilik sohasini takomillashtirishga oid qo‘shimcha chora-tadbirlar to‘g‘risida”gi qarori va ushbu hujjat chorvachilik mahsulotlari ishlab chiqarish hajmini yanada oshirish choralarini ko‘rish, buning uchun chorvachilik bilan shug‘ullanuvchi tadbirkorlik sub’yektlariga qulay sharoitlarni yaratib berish hamda naslchilikni tubdan rivojlantirishda yangicha yondashuvlarni tatbiq qilish maqsadlariga qaratilgani xususida   gapirdi. Chorvachilik mahsulotlarini yetishtirish va qayta ishlash sohasida ilg‘or xorijiy texnologiyalarni faol joriy etish, fermer xo‘jaliklari va qishloq xo‘jaligi tashkilotlarining moddiy-texnika bazasini mustahkamlash, ularning ishlab chiqarish salohiyatini yanada oshirish va Jahon banki bilan hamkorlikni yanada kengaytirish maqsadida Prezident qarori qabul qilingandi. Shu qaror doirasida hayvonlarni identifikatsiya qilish, ro‘yxatga olish va kuzatish tizimini joriy etishga 33 million dollar yo‘naltirilishi belgilandi.

Oliy Majlisi Senatining Agrar va suv xo‘jaligi masalalari qo‘mitasi raisi Bahodir Tojiyev mamlakatimizda aholi soni yil sayib oshib borayotgani o‘z – o‘zidan chorvachilik mahsulotlari iste’moli oshishiga olib kelishini, chorvachilik va veterinariya taraqqiyoti xalqimiz dasturxoni to‘kin, turmush darajasi yuqori bo‘lishiga xizmat qilishini ta’kidladi. Chorvachilik bilan shug‘ullanish ayni kunda mashaqqatli vazifa ekani va uning natijasi tez kunda emas, yillar davomida bilinishi va bu sohaga davlat ko‘magi zarurligi, qolaversa xukumat bu borada o‘z pozisiyasini hamisha bildirishga tayyorligi, xalqqa yordam berishi haqida o‘z fikr – mulohazalarini bayon qildi.

Konferensiyada, “Chorvachilikda identifikatsiya qilish naslchilik sohasini takomillashtirish to‘g‘risida” qo‘mita raisining o‘rinbosari R.Siddiqov, “Chorvachilik tarmoqlarini rivojlantish bo‘yicha amalga oshirilgan ishlar va kelgusidagi dolzarb vazifalar to‘g‘risida” Veterinariya va chorvachilikni rivojlantirish qo‘mitasi raisining o‘rinbosari A.Akbarov ma’ruzalari tinglandi. Chorvachilik va parrandachilik ilmiy – tadqiqot instituti direktori A.Nurmatov “Naslchilik ishlarini tashkil etish, ozuqa ekinlari urug‘chiligini rivojlantirish hamda ekan maydonlaridan samarali foydalanish xususida, Qoraqo‘lchilik va cho‘l ekologiyasi ilmiy – tadqiqot instituti direktori E.Shaptakov “Yaylovlarning degradatsiyaga uchrash sabablari, oqibatlari va unga qarshi kurashish choralari to‘g‘risida, Veterinariya ilmiy – tadqiqot instituti direktori B.Elmurodov Epizootik barqarorlikni ta’minlash borasida olib borilayotgan profilaktik tadbirlar to‘g‘risida ma’lumot berdilar.

Konferensiya ishida sohaning dolzarb muammolari muhokama etildi va unga yechimlar taklif etildi.

Axborot xizmati