2023 – 24 o‘quv yili uchun Qabul jarayonlari universitetda qanday tashkil etilgan? Yangi ochilgan ta’lim yo‘nalishlari haqida nimalar bilamiz? Oziq – ovqat havfsizligi va biotexnologiyalar sohasi mutaxassislariga talab qay darajada, universitet raqobatbardosh mutaxassis – kadrlar tayyorlay oladimi? Bugun viloyat Matbuot uyida ana shu mavzuda Samarqand davlat veterinariya medisinasi, chorvachilik va biotexnologiyalar universiteti mutasaddilari ishtirokida Press – konferensiya bo‘lib o‘tdi. Matbuot anjumanida universitet rektori, universitet qabul komissiyasi raisi, professor X.Yunusov boshchiligidagi ta’lim maskani mutasaddilari, o‘quv ishlari bo‘yicha prorektor, komissiya raisi o‘rinbosari, professor Abdug‘ani Elmurodov, mas’ul kotib Bobomurod Qo‘ldoshev, shuningdek fakultetlar dekanlari OAV xodimlari (Viloyat “Zarafshon”, “Samaorkandskiy vestnik”, “Ovozi Samarqand” gazetalari, “Zarnevs” sayti, “Xalq so‘zi” gazetasi viloyat bo‘limi, UzAA viloyat bo‘limi, “Samarqand yoshlari” gazeta va sayti, Viloyat “STR” va “STV” teleradiokompaniyalari muxbirlari) tomonidan berilgan barcha savollarga javob berishdi.

Anjumanda mas’ullar tomonidan universitetda 2023/2024 o‘quv yili qabulini yuqori saviyada o‘tkazish maqsadida tashkil etilgan qabul komissiyasi faoliyati, davlat oliy ta’lim muassasalariga o‘qishga qabul qilishning davlat buyurtmasi parametrlari, yangi o‘quv yilida bakalavriatning kunduzgi ta’lim shaklida davlat granti o‘rinlari soni, abituriyentlar va ularning ota – onalari uchun yaratilgan sharoitlar, imtiyozlar va ulardan kimlar foydalana olishi, shuningdek universitetda yangi ochilgan yo‘nalishlar va mutaxassisliklar haqida to‘liq ma’lumotlar berildi.

Samarqand davlat veterinariya medisinasi, chorvachilik va biotexnologiyalar universitetiga 2023/2024 o‘quv yili uchun kunduzgi ta’lim shakli bo‘yicha 7ta fakultetning jami 22ta ta’lim yo‘nalishlariga 1395 nafar, sirtqi ta’lim shakli bo‘yicha 13ta ta’lim yo‘nalishlariga 400 nafar va 31ta magistratura mutaxassisliklari bo‘yicha 94 nafar abituriyentlarni qabul qilish rejalashtirilgan. Bakalavriat ta’lim yo‘nalishlari kunduzgi ta’lim shakli uchun jami 22 ta ta’lim yo‘nalishi bo‘lib, shundan 3 tasi yangi ochilgan ta’lim yo‘nalishlaridir.

Universitetda qabul jarayonlari davom etmoqda.

Gulchehra Berdiyorova

Axborot xizmati