Bugun Samarqand davlat veterinariya medisinasi, chorvachilik va biotexnologiyalar Universitetida «Veterinariya va chorvachilik sohasida dolzarb muammolar va ularning yechimi» mavzusidagi Respublika ilmiy-amaliy konferensiyasi ish boshladi. Konferensiya ishida universitetning yaqin hamkorlaridan biri bo‘lgan Sank – Peterburg davlat veterinariya medisinasi universiteti professorlari, Rossiya Fanlar Akademiyasi akademiklari Eduard Javadov hamda Anatoliy Stekolnikovlar ishtirok etishmoqda.Konferensiyaning ochilish marosimi universitet faollar zalida tashkil etildi. Dastlab universitet mehmonlari e’tiboriga ta’lim maskani faoliyatiga oid ilmiy – amaliy ko‘rgazma namoyish qilindi.

Universitet rektori, professor Xudaynazar Yunusov mehmonlarni qutlar ekan, ikki yirik mutaxassis, veterinariya sohasining nufuzli namoyondalari bir vaqtning o‘zida bu maskanda bo‘lishidan professor – o‘qituvchilar va talaba – yoshlar hursand ekani, ularning ma’ruzalari barcha uchun qiziqarli va foydali bo‘lishi haqida ta’kidladi. Respublika Veterinariya va chorvachilikni rivojlantirish davlat qo‘mitasi boshqarma boshlig‘i o‘rinbosari, veterinariya fanlari doktori, professor Sobirjon Mavlonov qo‘mita raisi nomidan konferensiya ishiga muvaffaqiyat tiladi. Asli O‘zbekistonda tug‘ilib o‘sgan akademik Javadov bu yurt va uning kishilari olim hayotida muhim rol o‘ynagani, hamisha bu yerga kelish uchun intilishi va o‘tgan yilgi safari davomida juda foydali ishlar bilan shug‘ullangani, qolaversa, universitet professor – o‘qituvchilari va talaba – yoshlarining salohiyati va intilishlarini qadrlashi xususida ta’kidladi. 12 yil davomida Sank – Peterburg davlat veterinariya medisinasi Universitetini boshqargan Akademik Stekolnikov esa RFda ayni kunda 3 ta veterinariya ta’lim yo‘nalishi bo‘yicha oliy ta’lim muassasalari borligini aytib, O‘zbekistonda yagona bo‘lgan mazkur ta’lim maskani sohaga ixtisoslashgan horijiy oliy ta’lim dargohlari bilan hamkorlikni mustahkamlagani, o‘quv dasturlari va rejalari biri – biriga yaqin va mos bo‘lgan muassasalar va olimlar birgalikda rivojlanayotgani xususida gapirdi va muammolarga hamkorlikda ilmiy yechim izlanayotgani haqida fikr – mulohazalarini bayon etdi. Akademiklar marosim davomida Universitet jamoasiga o‘z ramziy sovg‘alarini taqdim etdilar. Shuningdek, marosim davomida akademiklarga universitet rektori tomonidan “Fahriy professor” diplomi va nishoni topshirilib, o‘zbek milliy libosi - zarbof to‘n kiydirildi va esdalik sovg‘alari taqdim etildi. Konfrensiyada «Veterinariya sohasida hayvonlar kasalliklarini oldini olish va davolashning dolzarb muammolari va ularning yechimi», «Chorva mahsulotlarini yetishtirish va qayta ishlash texnologiyalari hamda oziq-ovqat xavfsizligini ta’minlashdagi innovasiyalar» «Chorvachilik biotexnologiyasi hamda hayvonlarni saqlash, ozuqa yetishtirish, oziqlantirish va seleksiya ishlaridagi ilmiy yondashuvlar», «Chorvachilik va qishloq xo‘jaligida agrotexnologik jarayonlarni mexanizasiyalashtirish, resurs-energiya tejamkor qishloq xo‘jalik texnikalarini joriy etish va ularning iqtisodiyoti bo‘yicha olib borilgan tadqiqotlar» yuzasidan ilmiy maruzalar muhokama etildi. 

Konferensiya ishi ertaga ham davom etadi.

Axborot xizmati