O‘zbekiston Respublikasi Prezidentining 2019 yil 27 noyabrdagi PQ-4538-sonli qaroriga muvofiq Osiyo taraqqiyot banki ishtirokida “Chorvachilik sohasida qo‘shilgan qiymat zanjirini yaratishni rivojlantirish” loyihasi amalga oshirilmoqda. 2022 yilning 5 yanvar kuni Veterinariya va chorvachilikni rivojlantirish davlat qo‘mitasi tomonidan Osiyo taraqqiyot banki ishtirokida “Chorvachilik sohasida qo‘shilgan qiymat zanjirini yaratishni rivojlantirish” loyihasining ikkinchi komponenti “Chorvachilik tarmog‘ini qo‘llab quvatlash xizmatlarini yaxshilash” doirasida amalga oshirilishi rejalashtirilgan tadbirlar bo‘yicha “Yo‘l xaritasi” ishlab chiqilgan. “Yo‘l xaritasi” ijrosini ta’minlash maqsadida Samarqand davlat veterinariya medisinasi chorvachilik va biotexnologiyalar universitetida davlat va xususiy veterinariya xizmati mutaxassislarini qayta tayyorlash va malakasini oshirish dasturini yangilash va tadbiq etishda amaliy va uslubiy yordamlar ko‘rsatish uchun professor, veterinariya fanlari doktori M. Rao (Hindiston) Universitetga tashrif buyurdi. Doktor Rao universitet rektori, professor Yunusov qabulida bo‘ldi. Muloqot davomida horijiy ekspert va universitet mutasaddilari o‘rtasida davlat va xususiy veterinariya xizmati mutaxassislarini tayyorlashning zamonaviy usullari, yangicha yondashuvlar haqida fikr - mulohazalar almashildi.

Malaka oshirish markazi o‘quv dasturlarini jahon andozalariga moslashtirish uchun unga qanday o‘zgartirishlar kiritish mumkin? Universitet qoshidagi Malaka oshirish markazida qayta tayyorlanayotgan mutaxassislar sohaga oid zamonaviy bilimlarni chuqur egallashlari uchun nimalar talab etiladi.

Uchrashuvda shu kabi masalalar muhokama markazida bo‘ldi.

Xindistonlik professor bir muddat mamlakatimizda qolib, yuqoridagi savollar bo‘yicha izlanishlar olib boradi va o‘quv dasturlari xalqaro standartlar asosida qayta ko‘rib chiqiladi.

Axborot xizmati