Samarqand davlat veterinariya meditsinasi, chorvachilik va biotexnologiyalar universiteti rektori, professor Xudaynazar Yunusov boshliq universitet mutasaddilari ta’lim maskani qoshidagi Qamashi veterinariya meditsinasi texnikumiga tashrif buyurdi. Texnikumda o‘quv - uslubiy ishlar va amaliy klinik o‘quv jarayonining moddiy - texnik ta’minotini yaxshilash hamda uslubiy hamkorlik qilish maqsadida tashkil etilgan seminarda Respublika Veterinariya va chorvachilikni rivojlantirish qo‘mitasi boshqarma boshlig‘i J.Tursagatov, qo‘mitaning Qashqadaryo viloyat boshqarmasi boshlig‘i Sh. Eshmatov, tuman bo‘limlari boshliqlari (11 ta tuman). texnikum atrofida joylashgan 6 ta umumta’lim maktablari direktorlari va bitiruvchilari, mahalla vakillari ishtirok etishdi.

Uchrashuvni J.Tursagatov olib bordi. Muloqot davomida professor Yunusov texnikum faoliyatini jonlantirish, bu yerda tayyorlanayotgan o‘rta bo‘g‘in mutaxassislarini kerakli o‘quv - uslubiy qo‘llanma, darsliklar bilan ta’minlash, texnikum moddiy texnik bazasini yaxshilash borasida bir nechta jonli va samarali takliflarni ilgari surdi. Mahalla nuroniylari va soha mutaxassislari bilan fikr - mulohazalar almashindi. Sohaga qiziquvchi maktab bitiruvchilarining mulohazalari tinglandi. Uchrashuv samimiy va konstruktiv tarzda o‘tdi.

Qashqadaryo viloyat veterinariya va chorvachilikni rivojlantirish boshqarmasi boshlig‘i Sh.Eshmatov tomonidan texnikumni  o‘quv jarayonlari uchun zarur bo‘lgan uskuna va jihozlar bilan ta’minlashda, texnikum atrofidagi yer maydonlari va hududni obodonlashtirish, daraxt ko‘chalarini o‘tqazish va boshqa resurslardan samarali foydalanishda boshqarma ko‘mak berishi haqidagi takliflari hursandchilik bilan kutib olindi.

Muloqot davomida universitet fakultetlari dekanlari hamda mas’ul mutasaddi professor - o‘qituvchilarning texnikumda o‘quv jarayonilarini qiziqarli tashkil etish, o‘quvchilar bilan ishlash, amaliyot mashg‘ulotlarini sifatli tashkil etish borasidagi takliflari ilgari surildi.

E’tiborli tomoni - Qamashida mamlakatimizning oliy mukofoti sohibi O‘zbekiston qahramoni Abdu bobo Bozorov istiqomat qilarkan. Uchrashuvda qahramon tomonidan bildirilgan fikrlar - bugun va kelajak, yoshlarga qaratilayotgan xukumat darajasidagi e’tibor xususida, yana ham aniqrog‘i - shukronalik tuyg‘usi, harakat qilgan kishi albatta o‘z maqsadiga yetishi haqidagi ibratli gaplari bitiruvchilarni ruhlantirdi, desak mubolag‘a bo‘lmaydi.

Seminar ishtirokchilari texnikum tasarrufidagi yer maydonlari bilan tanishib, resurslardan foydalanish haqida fikr - mulohazalar almashdi.

Tadbir yakunida texnikumga Samarqand davlat veterinariya meditsinasi, chorvachilik va biotexnologiyalar universiteti tomonidan 200 tadan ortiq mutaxassislika oid darslik, o‘quv va uslubiy qo‘llanmalar taqdim etildi.

Axborot xizmati