Avval xabar berganimizdek, universitetimiz vakillari – O. Achilov, T. Taylakov va H. Niyazov 2025-yil 28-iyuldan 2-avgustgacha bo‘lgan xizmat safari davomida Janubiy Koreya Respublikasidagi “Korea Bentonite” qo‘shma korxonasi va “EAGLE VET” kompaniyasiga tashrif buyurishgan edi.

    Bugun esa Koreyaning “Korea Bentonite” kompaniyasi rahbariyati – direktor Dr. Jey Rhee, Dong-Hyon Shin hamda “EAGLE VET” kompaniyasi menejeri Kang Chang Hwa universitetimiz ilmiy salohiyatiga bo‘lgan katta qiziqish sabab, oradan ko‘p vaqt o‘tmay universitetimizga rasmiy tashrif buyurdi.

    Mehmonlarni universitetimiz rektori, professor X. Yunusov qabul qildilar. Uchrashuv davomida xizmat safari chog‘ida erishilgan kelishuvlar batafsil muhokama qilinib, ularni amalga oshirish bo‘yicha aniq rejalar belgilandi.

    Uchrashuv yakunida quyidagi kelishuvlar tasdiqlandi:

    Ilmiy-tadqiqot hamkorligi – veterinariya preparatlari va ozuqa qo‘shimchalar ishlab chiqarish bo‘yicha qo‘shma ilmiy loyihalar amalga oshiriladi.

    Texnologiya almashinuvi – Koreya tajribasi va zamonaviy ishlab chiqarish texnologiyalari professor-o‘qituvchilar hamda talabalarga taqdim etiladi.

    Mahsulot sinovlari – “KOREA BENTONITE” mahsulotlari universitet laboratoriyalarida sinovdan o‘tkaziladi.

    Kadrlar tayyorlash – talabalar va yosh olimlar uchun Koreya kompaniyalarida amaliyot va stajirovkalar tashkil etiladi.

   Universitet brendi ostida ishlab chiqarish – “EAGLE VET” kompaniyasi bilan hamkorlikda veterinariya dori preparatlarini universitetimiz brendi ostida ishlab chiqarishga kelishildi.