2026-yil 16-sentabr kuni Samarqand davlat veterinariya meditsinasi, chorvachilik va biotexnologiyalar universitetida ta’lim sifatini tashqi baholash, ta’lim tashkiloti va uning ta’lim dasturlarini kompleks hamda maxsus davlat akkreditatsiyasidan o‘tkazish jarayonlariga bag‘ishlangan rasmiy tadbir bo‘lib o‘tdi.
Ushbu muhim tadbir O‘zbekiston Respublikasi Prezidentining 2025-yil 5-maydagi PF-76-son Farmoni hamda Vazirlar Mahkamasining 2025-yil 6-avgustdagi 498-son qarori ijrosini ta’minlash, mamlakatimizda oliy ta’lim sifatini oshirish va uni xalqaro mezonlarga moslashtirishning yangi tizimini amaliyotga joriy etish maqsadida tashkil etildi.
Rasmiy tadbirda O‘zbekiston Respublikasi Prezidenti Administratsiyasi huzuridagi Ta’lim sifatini ta’minlash milliy agentligi vakillari, mahalliy ekspertlar hamda universitet professor-o‘qituvchilari ishtirok etishdi. Tadbir onlayn tarzda ham tashkil etilib, Zoom platformasi orqali xorijiy va mahalliy ekspertlar faol qatnashishdi.

Tadbirning kirish va asosiy qismida Ta’lim sifatini ta’minlash milliy agentligi Direktorining birinchi o‘rinbosari Ergashev Nodir Erniyozovich hamda universitet rektori Xudoynazar Yunusov so‘zga chiqishib, akkreditatsiya jarayoni, uning ta’lim rivojidagi o‘rni va muhim omillari haqidagi atroflicha fikr-mulohazalarini keng jamoatchilikka bildirishdi.
Shuningdek, akkreditatsiya jarayonining to‘liq shaffof ravishda tashkil etilishi uchun tizimga yangi islohotlar va zamonaviy mexanizmlar joriy etilganligi haqida batafsil ma’lumotlar berib o‘tildi.

Shundan so‘ng ishtirokchilar akkreditatsiya jarayonining aniq rejasi va bosqichlari bilan atroflicha tanishtirildi.
Tadbir va jarayonning asosiy yo‘nalishlari sifatida quyidagilar alohida e’tirof etildi:
Yangi baholash tizimi: Oliy ta’lim muassasasida ta’lim sifatini tashqi baholashning zamonaviy, adolatli va shaffof mexanizmlari amaliyotga tatbiq etildi;
Xalqaro va mahalliy ekspertiza: Ekspertlar guruhi tomonidan o‘quv dasturlari, moddiy-texnik baza, professor-o‘qituvchilar salohiyati va talabalar uchun yaratilgan sharoitlarni kompleks tahlil qilish ishlari yo‘lga qo‘yildi;
Davlat akkreditatsiyasi:
Muassasaning ta’lim yo‘nalishlarini kompleks hamda maxsus davlat akkreditatsiyasidan o‘tkazish orqali diplomlarning xalqaro darajada tan olinishiga mustahkam zamin yaratildi.
Tadbir davomida universitet professor-o‘qituvchilarining ma’ruzalari asosida tayyorlangan sohaga oid batafsil taqdimotlar yig‘ilganlar e’tiboriga havola etildi.
Ta’kidlash joizki, ushbu akkreditatsiya jarayoni va tashqi baholash tadbirlari universitet uchun shunchaki navbatdagi tekshiruv emas, balki oliy muassasaning xalqaro ta’lim maydonidagi o‘rnini mustahkamlash yo‘lidagi strategik qadam bo‘ldi.

SamDVMCHBU Axborot xizmati

​